अखेरच्या मंत्रिमंडळ विस्तारात निष्क्रिय आणि वाद्ग्रस्त मंत्र्यांना डच्चू मिळणार


वृत्तसंस्था / मुंबई :   राज्य मंत्रिमंडळ विस्ताराला अखेर आजचा मुहूर्त मिळाला आहे. विधानसभा निवडणुकीच्या पार्श्वभूमीवर होणाऱ्या फडणवीस सरकारच्या या अखेरच्या मंत्रिमंडळ विस्तारात निष्क्रिय आणि वाद्ग्रस्त मंत्र्यांना  डच्चू देत  नव्या चेहऱ्यांना संधी देण्याचा निर्णय भाजपने घेतला. शिवसेनेही काही मंत्र्यांच्या खात्यात बदल करण्याचा निर्णय घेतला आहे.  
 काही रिक्त जागा भरण्याबरोबरच वादग्रस्त आणि निष्क्रिय मंत्र्यांना घरी बसवण्यात येणार असून पक्षात नव्यानेच आलेल्या काही वजनदार नेत्यांचेही पुनर्वनस केले जाणार आहे. सूत्रांकडून मिळालेल्या माहितीनुसार, मुंबईतील एमपी मिल कंपाऊंड गृहनिर्माण प्रकल्पात लोकायुक्तांनी ठपका ठेवल्याने अडचणीत आलेले गृहनिर्माणमंत्री प्रकाश मेहता यांना मंत्रिमंडळातून अर्धचंद्र मिळणार असल्याचे सांगितले जात आहे. तसेच प्रदीर्घ अनुभव असतानाही आपल्या कामाची छाप पाडण्यात मागे पडलेले आणि सध्या रुग्णालयात दाखल असलेले आदिवासी विकासमंत्री विष्णू सावरा, सामाजिक  न्यायमंत्री राजकुमार बडोले, सार्वजनिक बांधकाम राज्यमंत्री प्रविण पोटे पाटील यांना मंत्रिमंडळातून वगळण्याचा निर्णय भाजपने घेतला असून त्यांना राजीनामे देण्यास सांगण्यात आल्याचे सूत्रांनी सांगितले. 
लोकसभा निवडणुकीत  पक्षाला चांगले यश मिळवून देण्यास हातभार लावणारे आशिष शेलार यांच्यासह योगेश सागर यांना मंत्रिमंळात संधी मिळण्याची शक्यता आहे. विदर्भातून अनिल बोंडे, डॉ. संजय कुटे, प्रा. डॉ. अशोक उईके यांना संधी मिळण्याची शक्यता असून मुख्यमंत्र्यांचे विश्वासू परिणय फुके यांचीही वर्णी लागण्याची शक्यता आहे.
 काँग्रेसमधून भाजपमध्ये आलेले माजी विरोधी पक्षनेते राधाकृष्ण विखे पाटील, भाजपचे मुंबई अध्यक्ष अशिष शेलार, योगेश सागर, अनिल बोंडे, डॉ. संजय कुटे, अतुल सावे, सुरेश खाडे, संजय भेगडे, परिणय फुके, प्रा. डॉ. अशोक उईके यांची, तर शिवसेनेतर्फे माजी मंत्री जयदत्त क्षीरसागर, राजेश क्षीरसागर, तानाजी सावंत आदींची वर्णी लागण्याची शक्यता आहे.  गृहनिर्माण मंत्री प्रकाश मेहता, आदिवासी विकासमंत्री विष्णू सावरा, सामाजिक न्यायमंत्री राजकुमार बडोले, प्रवीण पोटे पाटील  आणि राज्यमंत्री दिलीप कांबळे यांना मंत्रिमंडळातून अर्धचंद्र मिळण्याची शक्यता आहे.



  Print






News - Rajy | Posted : 2019-06-16






Related Photos