'ई-सिम' सादर झाल्यानंतर देशातील मोबाइल ग्राहक वाटेल तेव्हा मोबाइल सेवा पुरवठादार बदलू शकणार


वृत्तसंस्था /  नवी दिल्ली :     एम्बडेड सिम कार्डच्या मदतीने नवीन  क्रांती येऊ घातली आहे. दूरसंचार क्षेत्रातील तज्ज्ञ आणि अधिकाऱ्यांनी दिलेल्या माहितीनुसार 'ई-सिम' सादर झाल्यानंतर मोबाइल सेवा पुरवठादार कंपन्यांना ग्राहकांची संख्या कायम ठेवण्यासाठी आणि सेवेचा दर्जा राखण्यासाठी मोठी कसरत करावी लागणार आहे.  'ई-सिम' तंत्रज्ञान सादर झाल्यानंतर मोबाइल क्रमांक पोर्टेबिलिटी करण्याची प्रक्रिया अतिशय सुलभ होणार आहे. यामुळे ग्राहकांना वाटेल तेव्हा मोबाइल सेवा पुरवठादार बदलणे शक्य होणार आहे. 
त्यामुळे जुने ग्राहक टिकवून नवे ग्राहक मिळविण्यासाठी कंपन्यांना खूप प्रयत्न करावे लागणार आहेत. 'ई-सिम' हे डिजिटल सिम असून, जे ग्राहकांना कोणत्याही पारंपरिक सिमकार्डविना कोणत्याही कंपनीची सेवा देऊ शकणार आहे. अॅमडॉक्सच्या कस्टमर बिझनेस एक्झिक्युटिव्ह पंकज लांबा यांच्या मते मोबाइल सेवा पुरवठादाराच्या सेवेवर ग्राहक खूश नसेल, तर त्याला त्वरित कंपनी बदलता येणार आहे. ग्राहकसंख्या कमी होऊ नये असे वाटत असेल, तर कंपन्यांना चांगली आणि दर्जेदार सेवा द्यावीच लागेल. नव्या पद्धतीच्या सेवा आणि पॅकेजेस आणावीच लागतील, तेही योग्य दरात. सध्या ई-सिमचा उपयोग इंटरनेट ऑफ थिंग्ज (आयओटी) आणि मशिन टू मशिन (एमटूएम) सोल्यूशनसाठीच करण्यात येतो. 
व्होडाफेन आणि भारती एअरटेल सारख्या आघाडीच्या दूरसंचार कंपन्यांनी ई-सिमचा वापर करण्यास तयार असल्याचे स्पष्ट केले आहे. ही सेवा सुरू करण्यासाठी ई-सिम तंत्रज्ञानाला सहाय्यभूत ठरणारी उपकरणे सादर होण्याची वाट आम्ही पाहात आहोत. एअरटेल आणि रिलायन्स जिओ या कंपन्यांनी ई-सिमचा अंतर्भाव असणाऱ्या अॅपल वॉचच्या विक्रीसाठी अॅपलसह भागीदारीही केली होती. या दोन्ही कंपन्यांनी स्मार्टवॉचची विक्री वाढविण्यासाठी विशेष डेटा प्लॅनही सादर केले होते. 
ई-सिम तंत्रज्ञानाला सहाय्यभूत ठरणारी उपकरणे सध्या बाजारात उपलब्ध असली, तरी ती पहिल्या टप्प्यात आहेत. आयफोन एक्सएस, एक्सएस मॅक्स, एक्सआर आणि गुगल पिक्सेल ३ आदी निवडक स्मार्टफोनमध्येच ई-सिम चालू शकते. मात्र, हे सर्व हँडसेट अतिशय महागडे आहेत. व्होडाफोन आयडियाने दिलेल्या माहितीनुसार अद्याप ग्राहकांनी ई-सिमला स्वीकारलेले नसल्याने या तंत्रज्ञानाचा प्रसार होण्यास काही वेळ लागण्याची शक्यता आहे. 'काउंटरपॉइंट रिसर्च'च्या अहवालानुसार देशात सध्या ई-सिमचा वापर एक टक्क्यापेक्षाही कमी आहे. मात्र, २०२५पर्यंत तो २५ टक्क्यांपर्यंत पोहोचण्याची शक्यता आहे. 



  Print






News - World | Posted : 2019-06-10






Related Photos