आयुष्यमान भव अंतर्गत रामटेक येथील आरोग्य शिबीरास उत्स्फूर्त प्रतिसाद
- ३५० दिव्यांगासह १ हजार २०० रुग्णाची तपासणी
विदर्भ न्यूज एक्सप्रेस
प्रतिनिधी / नागपूर : संपूर्ण देशात १३ सप्टेंबरपासून आयुष्यमान भव या मोहिमेचा प्रारंभ झाला. असून मोहिमेचा भाग म्हणून नागपूर जिल्हयातील सर्व उपजिल्हा व ग्रामीण रुग्णालय येथे वैद्यकीय महाविद्यालयातील तज्ञ व राष्ट्रसंत तुकडोजी महाराज कॅन्सर रुग्णालय आणि सार्वजनिक आरोग्य विभाग यांच्या संयुक्त विद्यमाने भव्य आरोग्य तपासणी शिबीरे आयोजित करण्यात आलेली आहेत. त्यापैकी पहिले आरोग्य शिबीर उपजिल्हा रुग्णालय, रामटेक येथे यशस्वीरीत्या संपन्न झाले.
शिबीराचे उद्घाटक आमदार आशिष जायस्वाल आणि अध्यक्षस्थानी जिल्हा परिषद अध्यक्षा मुक्ता कोकड्डे होत्या. पंचायत समिती सभापती आणि रामटेक तालुक्यातील जिल्हा परिषद सदस्य, आरोग्य सेवेच्या उपसंचालक डॉ. कांचन वानेरे, जिल्हा शल्य चिकित्सक डॉ. निवृत्ती राठोड, जिल्हा आरोग्य अधिकारी डॉ. अजय डवले व वैद्यकीय अधिकारी डॉ. संजय वाघमारे उपस्थित होते.
आयुष्यमान भारत अंतर्गत नोंदणी करण्यात आलेल्या १०० टक्के लाभार्थ्यांना मोहिमेदरम्यान आयुष्यमान कार्ड मिळावेत, अशा सूचना आमदार आशिष जायस्वाल यांनी आरोग्य विभागास केल्या. प्रत्येक गावात सर्व सुविधांनी युक्त मोबाईल हॉस्पिटल व्हॅन उपलब्ध करुन देण्यात सोबतच प्रधान मंत्री आयुष्यमान भारत जन आरोग्य योजनेशी सलग्न असलेल्या रुग्णालयांसदर्भात रुग्णांच्या तक्रारींचे जलद निवारण होण्यास्तव तक्रार निवारण यंत्रणा विकसित करण्यात यावी, असेही त्यांनी सांगितले.
जिल्हा परिषद अध्यक्षा मुक्ता कोकड्डे यांनी प्रधान मंत्री आयुष्यमान भारत जन आरोग्य योजनेमध्ये गरजू व गरीब रुग्णाला योजनेचा लाभ मिळावा यासाठी योजनेची माहिती पाहोचविण्याचे आवाहन केले. आरोग्य सेवेच्या उपसंचालक डॉ. कांचन वानेरे यांनी आयुष्यमान शिबीरामार्फत गरजूंना लाभ देण्याची जबाबदारी आरोग्य विभागाची असल्याचे प्रतिपादन केले. जिल्हा शल्य चिकित्सक डॉ. निवृत्ती राठोड, यांनी शिबीराचे प्रास्ताविकात आयुष्यमान भव मोहिमेविषयी जनजागृती करून शिबीरांमार्फत जास्तीत जास्त रुग्णांना त्याचा लाभ कसा पोहोचविता येईल, याबाबत मार्गदर्शन केले.
शिबीरामध्ये शालिनी मेघे रुग्णालय, वानाडोंगरीद्वारे विशेष तपासणी करण्यात आली व १ हजार २०० रुग्णांनी या तपासणी शिबीराचा लाभ घेतला. ज्यामध्ये आयुष्यमान कार्ड तयार करणे, सिकल सेल चाचण्या, उच्च रक्तदाब, मधुमेह व कॅन्सर तपासणी, क्षयरोग, कुष्ठरोग आणि १८ वर्षांवरील सर्व पुरुषांची आरोग्य तपासणी या सेवांचा समावेश आहे. कॅन्सर तपासणी करीता राष्ट्रसंत तुकडोजी महाराज कॅन्सर रुग्णालय यांनी त्यांच्या तज्ज्ञ चमूसह कॅन्सर तपासणी व्हॅन उपलब्ध करून दिली. तसेच इंदिरा गांधी वैद्यकीय महाविद्यालयाच्या दिव्यांग मंडळाच्या चमूव्दारे शिबीरात ३५० दिव्यांग जनांची तपासणी करून त्यांचे यू.डी. आयडी कार्ड बनविण्यात आले.
आरोग्य शिबीराकरीता जिल्हाधिकारी डॉ. विपीन इटनकर याच्या पुढाकाराने विशेष आर्थिक तरतूद उपलब्ध करून देण्यात आली. तसेच मुख्य कार्यकारी अधिकारी सौम्या शर्मा, यांच्या मार्गदर्शनाखाली शिबीराचे आयोजन करण्यात आले. त्यानुषंगाने भव्य आरोग्य शिबीरामध्ये जास्तीत जास्त रुग्ण व दिव्यांग जनांना लाभ देता आला. तसेच शिबीरामध्ये आरोग्य प्रदर्शनी आयोजित करून सर्व आरोग्य योजनांची जनजागृती करण्यात आली.
शिबीराच्या यशस्वीतेकरीता उपजिल्हा रुग्णालय, रामटेक, तालुका आरोग्य अधिकारी, रामटेक आणि सर्व कार्यक्रम समन्वय, राष्ट्रीय आरोग्य अभियान यांनी सहकार्य केले.
News - Nagpur