महत्वाच्या बातम्या

गोंडवाना सैनिकी विद्यालयाचा प्रशासकीय व इतर सेवेत डंका

विदर्भ न्यूज एक्सप्रेस

प्रतिनिधी / गडचिरोली : महाराष्ट्र लोकसेवा आयोगा मार्फत घेण्यात आलेल्या फिशरी सर्व्हिस परीक्षेचे नुकतेच निकाल जाहीर झाले. या मध्ये गोंडवाना सैनिकी विद्यालयाच्या माजी विद्यार्थ्यांनी प्रथम येण्याचा मान पटकाविला आहे. लवकरच ते आता प्रशासकीय सेवेत अधिकारी म्हणून रुजू होणार आहेत.

महाराष्ट्र लोकसेवा आयोगामार्फत घेण्यात आलेल्या फिशरी सर्व्हिस परीक्षेमध्ये गोंडवाना सैनिकी विद्यालयाचे माजी विद्यार्थी शुभम येलेश्वर कोमरेवार हा सामान्य वर्गातून तर मोंटी मदन मेश्राम हा एस.टी. प्रवर्गातून फिशरी सर्व्हिस परीक्षेत राज्यातून प्रथम येण्याचा मान पटकाविला आहे. या दोघांची निवड कमिशनर ऑफ फिशरी ग्रेड -१ या पदाकरिता झाली असून फिशरी डेव्हलोपमेंट ऑफिसर ग्रेड -२ या पदाकरिता सुद्धा ते पात्र ठरले आहेत. लवकरच ते प्रशासकीय सेवेत दाखल होऊन मत्स्यविभागात आपली सेवा देणार आहेत.

महापोर्टल द्वारे घेण्यात आलेल्या २०१९ च्या परीक्षेत दहावा क्रमांक घेऊन सहाय्यक मत्स्य व्यवसाय विकास अधिकारी या पदी निवड झाली. गडचिरोली सहाय्यक मत्स्यव्यवसाय विकास अधिकारी कार्यालयात कार्यरत होते. सध्या शुभम येलेश्वर कोमरेवार सहाय्यक मत्स्यव्यवसाय विकास अधिकारी म्हणून विभागीय आयुक्त कार्यालय हडपसर पूणे येथे कार्यरत आहे. आपल्या स्वजिल्ह्यात गडचिरोली येथे ही या पदावर उल्लेखनीय कार्य केलेले होते.

इयत्ता दहावी नंतर त्याने महाराष्ट्र लोकसेवा आयोगाची परीक्षा देण्याचे ध्येय निश्चित केले होते. मात्र त्यासाठी लागणारी तयारी, क्लासेस हे गडचिरोलीत उपलब्ध नव्हते. त्यामुळे एमपीएससीच्या परीक्षेसाठी करावी लागणारी तयारी याचा कोणताही अंदाज आपल्याला नव्हता, असे शुभम सांगतो. राज्यात पहिला आलेला शुभम येलेश्वर कोमरेवार हा मूळचा गडचिरोली जिल्ह्यातील अहेरी या गावचा रहिवाशी आहे. शुभमचे वडील येलेश्वर कोमरेवार सेवानिवृत्त केंद्रप्रमुख तर आई रत्नप्रभा येलेश्वर कोमरेवार पदवीधर शिक्षिका आहे. लहानपणापासून सरकारी अधिकारी व्हायचे हे शुभमचे ध्येय, चिकाटी व मेहनत आणि त्याला त्याच्या आई-वडिलांनी साथ दिली. घरचे वातावरण शैक्षणिक असल्याने अधिकारी होण्याचे बाळकडू लहानपणापासून मिळाले. या यशाचे श्रेय आई वडीलांच्या पुण्याई ला दिले. तर मॉन्टी चे वडील हे सुद्धा गडचिरोली येथील मूळ रहिवासी असून सेवानिवृत्त शिक्षक आहेत व आई गृहिणी आहेत.

कमी वयात दैदीप्यमान यश संपादन केल्याबद्दल शुभम व मोंटी चे सर्वत्र कौतुक होत आहे. सोबतच गोंडवाना सैनिकी विद्यालयातील या वर्षीचे विद्यार्थी धीरज भोयर, तेजस पोटावी, प्रियांशु चिलगेलवार, मनीष चावर, गौरव मेश्राम यांचा वैद्यकीय शिक्षण (एम.बी.बी.एस.) करिता निवड झाली आहे.

निवड झालेल्या सर्व यशस्वी विद्यार्थ्यांचा भगवंतराव मेमोरियल शिक्षण संस्था अहेरी चे सचिव धर्मरावबाबा आत्राम अध्यक्षा भाग्यश्री हलगेकर (आत्राम), मार्गदर्शक ऋतुराज हलगेकर यांनी विशेष कौतुक केले तर विद्यालयाचे प्राचार्य संजय गोसावी उपप्राचार्य ओमप्रकाश संग्रामे, पर्यवेक्षक अजय वानखेडे व विद्यालयातील समस्त शिक्षक व शिक्षकेत्तर कर्मचारी यांनीहि सर्वांचे अभिनंदन केले व भावी वाटचालीकरिता शुभेच्छा दिल्या आहेत .