महत्वाच्या बातम्या

जिल्हाधिकारी राहुल कर्डिले यांनी पर्यावरण समितीचा घेतला आढावा

विदर्भ न्यूज एक्सप्रेस

प्रतिनिधी / वर्धा : जिल्हा पर्यावरण समितीचा जिल्हाधिकारी राहुल कर्डिले यांनी आढावा घेतला. पर्यावरण संवर्धनासह प्रदुषण नियंत्रणासाठी प्रभावी उपाययोजना करण्याचे निर्देश जिल्हाधिकाऱ्यांनी बैठकीत संबंधित विभागाच्या अधिकाऱ्यांना दिले.

बैठकीला जिल्हाधिकाऱ्यांसह उपवनसंरक्षक राकेश सेपट, उपमुख्य कार्यकारी अधिकारी डॅा.ज्ञानदा फणसे, जिल्हा माहिती अधिकारी मंगेश वरकड, उद्योग उपसंचालक सुशील गरुड, पर्यावरण विभागाचे अधिकारी मनोज वाटाणे, समितीचे अशासकीय सदस्य राणा रणनवरे, प्रवण जोशी, मुरलीधर बेलखोडे, राहुल चोपडा आदी उपस्थित होते.

पर्यावरण संवर्धन काळाजी गरज आहे. त्यामुळे पर्यावरणाचा कुठेही ऱ्हास होणार नाही, याची दक्षता घेण्यात यावी. विविध प्रकारच्या प्रदुषणामुळे पर्यावरणावर परिणाम होतो. त्यामुळे प्रदुषण करणाऱ्यांवर नियमाप्रमाणे कारवाई करण्यात यावी. याबाबत जनजागृतीवर भर द्यावा, अशा सुचना बैठकीत जिल्हाधिकारी राहुल कर्डिले यांनी केल्या.

औद्योगिक वसाहतींसह शहरांमध्ये स्वयंचलीत प्रदुषण मोजणी यंत्र बसविण्यात यावे. याद्वारे प्रदुषणाच्या पातळीवर लक्ष ठेवणे सोईचे होईल. यासाठी आवश्यक कारवाई पर्यावरण विभागाने करावी. पर्यावरणाच्या संवर्धनासाठी वृक्षांचे महत्व अनन्यसाधारण आहे. त्यामुळे विनापरवानगी वृक्षांची कटाई केल्या जावू नये. असे आढळून आल्यास योग्य ती कारवाई केली जावी, असे जिल्हाधिकारी म्हणाले.

यावेळी अशासकीय सदस्य राणा रणनवरे यांनी पर्यावरणाच्या वाढीसाठी मोठ्या प्रणामावर वृक्षांची लागवड केली जाते. रस्त्याच्या दुतर्फा केली जाणारी लागवड झाडे मोठे झाल्यानंतर अपघातास कारण ठरतात. त्यामुळे वाढलेली ही झाडे तोडावी लागतात. त्यामुळे दुतर्फा झाडे लावतांना रस्त्यावर अंतर ठेऊन लावली जावी, अशी सुचना केली. प्रणव जोशी, मुरलीधर बेलखोडे, राहुल चोपडा यांनी देखील पर्यावरण संवर्धनासाठी अनेक प्रकारच्या सुचना केल्या. या सुचनांप्रमाणे कारवाई करण्याचे निर्देश जिल्हाधिकाऱ्यांनी बैठकीत दिले.