महत्वाच्या बातम्या

माजी जि.प.अध्यक्ष भाग्यश्री आत्राम गाडी थांबवून धावल्या अपघातग्रस्ताच्या मदतीला

- सिरोंचा तालुक्यातील वडधम गावाजवळील घटना

विदर्भ न्यूज एक्सप्रेस

प्रतिनिधी / सिरोंचा : अपघातग्रस्तांना मदत करा असे आवाहन शासन आणि प्रशासनाच्या वतीने सातत्याने करण्यात येते. मात्र, भाग्यश्री आत्राम सारख्या महिला नेत्याने स्वतः अपघातग्रस्ताच्या मदतीला धावून जात सामान्य नागरिकासमोर एक उदाहरण घालून दिले आहे.

माजी जि.प. अध्यक्ष तथा सिनेट सदस्य भाग्यश्री आत्राम यांनी आज (शनिवार) सिरोंचा तालुक्यातील अंकिसा दौरा करून सिरोंचा कडे परत येत असताना वडधम गावापासून पुढे ५ किलोमीटर अंतरावर एका दुचाकीस्वाराचा वाहनवरील नियंत्रण सुटल्याने राष्ट्रीय महामार्गावर अपघात झाला व सदर व्यक्ती रक्तबंबाळ अवस्थेत पडलेला आढळून आला. भाग्यश्री आत्राम यांनी क्षणाचाही विलंब न करता आपला थापा थांबवून त्याला आपल्या स्वतःच्या वाहनात टाकून थेट रुग्णालय गाठले.

रमेश दुर्गय्या तोंगा (३०) असे अपघातात गंभीर जखमी झालेल्या व्यक्तीचे नाव असून त्याच्यासोबत १३ वर्षीय मुलगी होती. सुदैवाने तिला कुठेही लागला नव्हतं. मात्र, वडिल अपघातात गंभीर जखमी होऊन बेशुद्ध अवस्थेत पडल्याने ती भर रस्त्यावर रडत होती. हे दृश्य बघून तात्काळ भाग्यश्री आत्राम यांनी आपल्या कार्यकर्त्यांच्या मदतीने स्वतःच्या वाहनात टाकून त्या अपघातग्रस्त व्यक्तीला रुग्णालयात दाखल केले.

सध्या त्याच्यावर सिरोंचा येथील रुग्णालयात उपचार सुरू असून वेळेवर उपचार मिळाल्याने अनर्थ टळला असलातरी डोक्याला जबर मार असल्याचे सांगण्यात येत आहे. या मदतीमुळे अपघातग्रस्त तोंगा कुटुंबीयांनी भाग्यश्री आत्राम यांचे आभार मानले आहे. अपघातग्रस्त व्यक्तीला रुग्णालयात दाखल करण्यासाठी राष्ट्रवादी काँग्रेसचे सिरोंचा तालुकाध्यक्ष मधुकर कोल्लूरी, वेंकटलक्ष्मी आरवेली, जगदीश रालाबंडीवार, रवी सुलतान, एम डी शानु, सार्थक आत्राम, श्रीकांत गुरनूले आदी राष्ट्रवादी काँग्रेसच्या कार्यकर्त्यांनी मदत केली.