महत्वाच्या बातम्या

 अधिक प्रयोगशील व उपक्रमशील व्हा !


- जि.प.अध्यक्षा मुक्ता कोकड्डे यांचे शिक्षकांना आवाहन

- जिल्हास्तरीय शिक्षक दिन पुरस्कारांचे वितरण

विदर्भ न्यूज एक्सप्रेस 

प्रतिनिधी / नागपूर : आई नंतरचा दुसरा गुरू हा शिक्षक असतो. विद्यार्थ्यांच्या जीवनाला वळण देण्याचे काम शिक्षकांमार्फत होत असते. विद्यार्थ्यांच्या जीवनातील शिक्षकांचे अनन्यासाधारण महत्व लक्षात घेता शिक्षकांनी अधिक प्रयोगशील व उपक्रमशील होण्याची गरज असल्याचे प्रतिपादन जिल्हा परिषदेच्या अध्यक्षा मुक्ता कोकड्डे यांनी केले.

शिक्षण क्षेत्रात मोलाचे योगदान देणाऱ्या शिक्षकांना दरवर्षी शिक्षक दिनी जिल्हास्तरीय पुरस्कार देण्यात येतो. यंदा या पुरस्कारासाठी एका विशेष शिक्षकासह १४ जणांची निवड करण्यात आली आहे. या पुरस्कार वितरण समारंभप्रसंगी अध्यक्षा मुक्ता कोकड्डे बोलत होत्या. यावेळी आ. सुनील केदार, उपायुक्त विवेक इलमे, जि.प. च्या मुख्य कार्यकारी अधिकारी सौम्या शर्मा, जि.प. च्या विविध विभागांचे सभापती, जि.प. सदस्य, शिक्षणाधिकारी (प्राथमिक) रोहिणी कुंभार, शिक्षणाधिकारी (माध्यमिक) रविंद्र काटोलकर, शिक्षक व शिक्षकेत्तर कर्मचारी मोठ्या संख्येने उपस्थित होते.

कौशल्यावर आधारित शिक्षणाला अनन्यसाधारण महत्त्व प्राप्त झाले आहे. नियमित अभ्यासक्रमाबरोबर विद्यार्थ्यांनी वेगवेगळी कौशल्ये आत्मसात करण्याकडे विद्यार्थ्यांना शिक्षकांनी प्रवृत्त करावे, असे अध्यक्षा कोकड्डे यांनी यावेळी सांगितले.

आ. सुनील केदार यांनीही यावेळी आपले विचार व्यक्त करीत पुरस्कारप्राप्त शिक्षकांना शुभेच्छा देत शिक्षण क्षेत्रात अधिक उमेदीने काम करण्याचे आवाहन केले.

गेल्या वर्षभरात जिल्हा परिषदेमार्फत विद्यार्थीकेंद्रीत विविध उपक्रमांचे आयोजन करण्यात आले. यात अभिरुप जी-२०, कॅाफी विथ सीईओ, अभ्यास दौरा अशा सर्वांगाने विद्यार्थ्यांना वळण देणाऱ्या व अभ्यासाबरोबरच अधिक प्रयोगशील व उपक्रमशील होण्याचा प्रयत्न जि.प.च्या शिक्षण विभागामार्फत करण्यात आला आहे. विद्यार्थ्यांचाही प्रयोग व उपक्रमांना उत्स्फूर्त प्रतिसाद लाभल्याचे जि.प.च्या मुख्य कार्यकारी सौम्या शर्मा यांनी सांगितले.

आदर्श शिक्षक पुरस्काराने १४  शिक्षकांचा गौरव -

आदर्श शिक्षक पुरस्काराने जिल्ह्यातील १४ शिक्षकांचा गौरव करण्यात आला. यात हेमचंद बाबुलाल ठकराल जि.प.प्रा.शाळा पेठ (कालडोंगरी) पं.स. नागपूर (ग्रा.), उज्वला नंदकिशोर उके जि.प. प्राथमिक शाळा, हरदोली प.सं. कुही, अरविंद राठोड जि.प.उ.प्रा. शाळा, शिलादेवी ता. पारशिवनी, सुनील ठाकरे जि.प.प्रा. शाळा पुसागोंदी ता. काटोल, राजेश सोरले जि.प.प्रा. शाळा वलनी (माईन) ता. सावनेर, गुरुदास दिघोरे जि.प.उ.प्रा. शाळा शेडेश्वर ता. उमरेड, हेमराज बनसिंगे जि.प.उ.प्रा. शाळा सुरादेवी ता. कामठी, संगीता सवाईमुल जि.प.प्रा. शाळा आदासा ता. कळमेश्वर, अनिल राठोड जि.प.उ.प्रा. शाळा अड्याळ ता. भिवापूर, गजानन बेले जि.प.उ.प्रा. शाळा पिपरी ता. मौदा, आशा मेश्राम जि.प.उ.प्रा. शाळा गुमगाव क्र. २ ता. हिंगणा, मनिषा रोडकर जि.प.उ.प्रा. शाळा मुकनापूर ता. रामटेक, सुभाष गायधने जि.प.उ.प्रा. शाळा माणिकवाडा ता. नरखेड यांना गौरविण्यात आले. तर विशेष शिक्षकाच्या पुरस्काराने भीमराव सालवनकर जि.प.उ.प्रा. शाळा गहूहिवरा ता. पारशिवनी यांचा सन्मान करण्यात आला.





  Print






News - Nagpur




Related Photos