शास्त्रीय गायन रंगतरंग कार्यक्रमास रसिक श्रोत्यांची पसंती
विदर्भ न्यूज एक्सप्रेस
प्रतिनिधी / नागपूर : जी-२० च्या अंतर्गत आकाशवाणी नागपूर केंद्राद्वारे आयोजित शास्त्रीय संगीताचा रंगतरंग कार्यक्रम नुकताच सायंटिफिक हॉल लक्ष्मी नगर येथे संपन्न झाला. कार्यक्रमाचे उद्घाटन दिगंबर पिंपळघरे आणि दीपक कुलकर्णी यांच्या हस्ते दीप प्रज्वलन करून करण्यात आले. या कार्यक्रमास रसिक श्रोत्यांची पसंती लाभली.
मान्यवरांचे तसेच कलाकारांचे स्वागत पुष्पगुच्छ आणि जी-२० चे मानचिन्ह देऊन करण्यात आले. यावेळी आकाशवाणी नागपूरचे केंद्रप्रमुख रमेश घरडे, आकाशवाणी नागपूरचे माजी केंद्र प्रमुख दिगंबर पिंपळघरे आणि दक्षिण मध्य सांस्कृतिक केंद्राचे सहाय्यक निर्देशक दीपक कुलकर्णी यांनी मनोगत व्यक्त केले.
कार्यक्रमाची सुरुवात डॉ. जयश्री वैष्णव यांच्या शास्त्रीय गायनानी झाली. त्यांनी राग पुरिया धनश्री प्रस्तुत केला. त्यांना तबल्यावर साथ शांतनु माई, हार्मोनियम वर संदीप गुरमुले आणि तानपुऱ्यावर राजेंद्र जोहरापूरकर आणि राधा ठेंगणी यांनी केली. त्यानंतर डॉ. चित्रा मोडक यांचे शास्त्रीय गायन झाले. त्यांना तबल्यावर संगत केली संदेश पोपटकर यांनी.
कार्यक्रमाची सांगता सतार आणि व्हायोलिन जुगलबंदीने झाली. सतारीवर पंडित अवनिंद्र शेवलीकर आणि व्हायोलिन वर शिरीष भालेराव होते. त्यांना तबल्यावर संदेश पोपटकर आणि शंतनु माई यांनी समर्पक साथ केली. त्यांनी राग जोग प्रस्तुत केला.
कार्यक्रमाचे सूत्रसंचालन आकाशवाणीच्या उद्घोषिका राधिका पात्रीकर यांनी केले. कार्यक्रमाचे आभार कार्यक्रम प्रमुख रचना पोपटकर गजभिये यांनी मानले.
News - Nagpur