राष्ट्रीय स्वयंसेवक संघाच्या तृतीय वर्ष संघ शिक्षा प्रशिक्षण वर्गाच्या समारोपाला उद्योगपती रतन टाटा उपस्थित राहणार


विदर्भ न्यूज एक्सप्रेस 
प्रतिनिधी / नागपूर : 
राष्ट्रीय स्वयंसेवक संघाच्या तृतीय वर्ष संघ शिक्षा प्रशिक्षण वर्गाच्या समारोपाला प्रसिद्ध उद्योगपती व टाटा समूहाचे अध्यक्ष रतन टाटा प्रमुख अतिथी म्हणून उपस्थित राहण्याची शक्यता वर्तवण्यात येत आहे. प्रशिक्षण वर्गाच्या समारोपाला समाजातील प्रतिष्ठातांना आमंत्रित करण्याची प्रथा आहे. त्यात प्रथमच उद्योगपती रतन टाटा यांना आमंत्रित करण्यात येत असल्याची माहिती संघातील सूत्रांनी दिली. 
गेल्या प्रशिक्षण वर्गाच्या समारोपाला माजी राष्ट्रपती प्रणव मुखर्जी यांना आमंत्रित करण्यात आले होते. त्यानंतर देशातील राजकीय वातावरण तापले होते. काँग्रेसकडूनच प्रणव मुखर्जी यांच्यावर टीका झाली होती. परंतु, प्रणव मुखर्जी यांनी टीकेनंतरही संघस्थानावर हजेरी लावली होती. इतकेच नव्हेतर त्यांनी संघ अत्यंत जवळून अनुभवला होता. संघ विचारधारेच्या विरोधातील मते असतानाही माजी राष्ट्रपती मुखर्जी यांनी संघस्थानावर येऊन त्यांची राष्ट्रवादाची मते परखडपणे मांडली होती. त्यामुळेच यंदा प्रशिक्षण वर्गाच्या समारोपाला कोणते अतिथी येणार, त्याबाबत उत्सुकता निर्माण झाली. 
दरम्यान, संघाच्या तृतीय वर्ष प्रशिक्षण वर्गासाठी देशभरातून ८२५ स्वयंसेवक सहभागी झाले आहेत. त्या प्रशिक्षणाचा समारोप १६ मे रोजी होत असून, त्या समारोपाला उपस्थित राहण्याचे निमंत्रण उद्योगपती रतन टाटा यांना देण्यात आले आहे. त्यांनी अद्याप त्या निमंत्रणाचा स्वीकार केला नसला तरीही येत्या काही दिवसांत त्यांच्याकडून सकारात्मक प्रतिसाद येईल, अशी अपेक्षा व्यक्त करण्यात येत आहे. 
केंद्रात पुन्हा एकदा मोदी सरकार स्थापन होत असल्याने स्वयंसेवकांमध्ये उत्साहाचे वातावरण आहे. केंद्रात बहुमताचे सरकार स्थापन करण्यात भाजपला यश आले आहे. सरसंघचालक डॉ. मोहन भागवत हे लोकसभा निवडणुकीच्या निकालानंतर पहिल्यांदाच जाहीर भाषण करणार आहेत. त्यामुळे सरसंघचालक डॉ. भागवत यांच्या भाषणाकडेही देशाचे लक्ष लागले आहे.  



  Print






News - Nagpur | Posted : 2019-05-27






Related Photos