टीव्हीवर दिसणे आणि पेपरमध्ये छापून येणं दूर ठेवा :पंतप्रधान नरेंद्र मोदी


वृत्तसंस्था /  नवी दिल्ली :  लोकसभेत पहिल्यांदा खासदार झालेल्यांनी प्रसिद्धीच्या मोहापासून दूर राहा. लालकृष्ण अडवाणी नेहमी सांगायचे की, छापणे आणि दिसणे यापासून लांब राहिला तर ते तुमच्यासाठी फायद्याचं आहे. त्यामुळे टीव्हीवर दिसणे आणि पेपरमध्ये छापून येणं दूर ठेवा असा सल्ला पंतप्रधान नरेंद्र मोदी यांनी नवीन खासदारांना दिला आहे. अनेक प्रस्थापितांना पराभूत करुन तुम्ही आला आहात त्याचा घमंड ठेवू नका, तुम्ही मोदींमुळे निवडून आला नाही तर जनतेच्या आदेशामुळे निवडून आला आहे. जनतेच्या मतांचा  सन्मान करा. जनता आणि स्वत: यामध्ये अंतर ठेऊ नका. अहंकारापासून दूर ठेवा असंही नरेंद्र मोदी म्हणाले.  
 अजून कोण निवडून आलं आहे, कोण पडलं आहे याची यादी माझ्याकडे आली नाही. पण देशात अनेक नरेंद्र मोदी जन्माला आले, त्यांनी मंत्रिमंडळ पण जाहीर केलं. ज्या लोकांची नावं चर्चेत आहेत त्यांना स्वप्न पडली आहेत. मला कोणतं खातं मिळणार याची लालसा बाळगू नका, सरकारमध्ये कोण मंत्री होणार हे मिडीया ठरवणार नाही.  त्यामुळे अफवांवर विश्वास ठेवू नका. ज्यांची नावं आहेत त्यांनी सांगा माझं नावं काढून टाका. ज्यांना मंत्रिमंडळ बनविण्याचा अधिकार आहे तेच हे काम करतील तुम्ही करु नका असा टोला पंतप्रधान नरेंद्र मोदी यांनी भाजपा नेत्यांना लगावला. 
महात्मा गांधी, पंडीत दिनदयाळ उपाध्यय, राममनोहर लोहिया या तीन महापुरुषांचे विचार घेऊन पुढे चला, हे विचार तुम्हाला पुढे आणतील.  डॉ. बाबासाहेब आंबेडकरांनी जी घटना दिली आहे त्याच्या कसोटीत राहून काम केलं तर कोणत्याही संकटाला तुम्हाला सामोरं जावं लागणार नाही.  संविधानाची साक्ष ठेऊन संकल्प करा,  असेही पंतप्रधान नरेंद्र मोदी म्हणाले. 



  Print






News - World | Posted : 2019-05-25






Related Photos