पशुसंवर्धनच्या अनुदान योजनांचा लाभ घेण्याचे आवाहन
- योजनेच्या अंमलबजावणीबाबत बैठक
- योजनांसाठी ५० लाखांपर्यंत अनुदान
विदर्भ न्यूज एक्सप्रेस
प्रतिनिधी / वर्धा : पशुसंवर्धन विभागाच्यावतीने केंद्र शासन पुरस्कृत राष्ट्रीय पशुधन अभियानांतर्गत कुक्कुटपालन, शेळी मेंढी युनिट, वराह पालन, पशुखाद्य व वैरण निर्मिती या प्रकल्पांसाठी अनुदान देण्यात येते. या योजनांच्या अंमलबजावणीबाबत मुख्य कार्यकारी अधिकारी रोहन घुगे यांच्या अध्यक्षतेखाली बैठक घेण्यात आली.
रोजगार निर्मिती व उद्योजकता विकासासाठी पशुधनाची उत्पादकता, दूध, लोकर, अंडी, मांस, वैरणीची उपलब्धता वाढविणे, पशुधनाच्या वंशावळीत सुधारणा करणे हा राष्ट्रीय पशुधन अभियानाच्या सुधारित योजनेचा उद्देश आहे. असंघटीत क्षेत्रातील उत्पादनांची विक्री व्हावी व त्यांना चांगला कच्चा माल मिळावा यासाठी संघटीत क्षेत्राशी जोडण्यात येणार आहे.
अभियानात कुक्कुट, शेळी, मेंढी व वराह प्रजाती विकास तसेच पशुखाद्य व वैरण उद्योजकता विकास या अंतर्गत अर्ज करता येईल. त्यात अंडी उत्पादनासाठी एक हजारपेक्षा अधिक कुक्कुट संगोपन प्रकल्पासाठी २५ लक्ष अनुदान उपलब्ध आहे. शेळी-मेंढी युनिटसाठी १०० मादी व पाच नर ते ५०० मादी व २५ नर यानुसार १० ते ५० लक्ष रुपये अनुदान उपलब्ध आहे, वराह पालन युनिटसाठी ५० मादी व ५ नर ते १०० मादी व १० नर याप्रमाणे १५ ते ३० लाख रुपये अनुदान उपलब्ध आहे. पशुखाद्य व वैरण, मूरघासबेल, वैरणीच्या विटा, टीएमआर निर्मिती प्रकल्पाला ५० लाख रुपये अनुदान उपलब्ध आहे.
या योजना ही केंद्र पुरस्कृत महत्वाकांक्षी योजना असून योजनेकरीता वैयक्तीक स्वयंसहायता बचतगट, शेतकरी उत्पादक संघ, कंपनी तसेच संयुक्त दायित्व गट अर्ज करु शकतात. योजनेच्या लाभासाठी ईच्छुकांनी एनएलएम उदयममित्र या पोर्टलवर अर्ज करावा. विभागाकडून हा अर्ज तपासून बँकेकडे मंजुरीसाठी सादर केला जातो. बँकेने कर्जपुरवठ्याची हमी दिल्यावर राज्य समितीच्या शिफारसीसह केंद्र शासनाकडे प्रस्ताव पाठविला जाईल. प्रकल्पासाठी स्वतःची किंवा भाडेतत्वावरील जमीन आवश्यक आहे.
योजनेच्या अंमलबजावणी बाबत कार्यशाळा -
योजनेचे उद्देश व माहिती गावपातळीपर्यंत व्यापक स्वरुपात पोहचविण्यासाठी मुख्य कार्यकारी अधिकारी रोहन घुगे यांच्या अध्यक्षतेखाली पशुसंवर्धन विभागाचे सर्व अधिकारी तसेच जीवनोन्नती अभियानाचे सर्व अधिकारी व कर्मचारी यांची संयुक्त कार्यशाळा आयोजित करण्यात आली होती. कार्यशाळेमध्ये गावपातळीपर्यंत माहिती व अर्ज याबाबत कालबध्द नियोजन करण्यात आले. रोहन घुगे यांनी जास्तीत जास्त संख्येत पशुपालकांनी योजनेचा लाभ घ्यावा असे आव्हान केले आहे.
News - Wardha