पालक सचिव विकास खारगे यांनी घेतला पाणी टंचाई , महसूल व अन्य विभागांचा आढावा


- ३३  कोटी वृक्षलागवड कार्यक्रमांतर्गत  दिलेले उद्दिष्ट पुर्ण करण्याचे निर्देश
विदर्भ न्यूज एक्सप्रेस 
प्रतिनिधी / गडचिरोली :
जिल्हयातील पाणी टंचाई, चारा टंचाई व रोजगार हमीचे कामाबाबत तसेच  महसूल विभागासह अन्य सर्व  विभागांचा विकास कामांचा आढावा महसूल व वन विभागाचे तसेच जिल्ह्याचे पालक सचिव  विकास खारगे यांनी आज एका बैठकीत घेतला.   बैठकीत ३३ कोटी वृक्ष लागवड कार्यक्रमांतर्गत दिलेले उद्दिष्ट पुर्ण करण्याचे निर्देश आज त्यांनी सर्व कार्यलय प्रमुखांना दिले.
 जिल्हाधिकारी कार्यालयाच्या समिती सभागृहात आढावा बैठक पार पडली.  यावेळी जिल्हाधिकारी शेखर सिंग, मुख्य कार्यकारी अधिकारी डॉ. विजय राठोड उपस्थित होते.
  ग्रामीण पाणी पुरवठा विभागांनी बैठकीत माहिती देतांना सांगितले की, माहे सप्टेंबर २०१८ चे पाणी टंचाई अहवालाचे आधारे जिल्ह्यात पाणी टंचाई टप्पा १ व २ मध्ये टंचाई सदृष्य परिस्थिती नसल्यामुळे निरंक पाणी टंचाई आराखडे सादर करण्यात आले.  तसेच जिल्हा पशुसंवर्धन उपआयुक्तांनी माहिती देतांना म्हणाले की, जिल्हयात गाई म्हशी, बैल, शेळी, मेंढी यांची संख्या ७ लाख ९४  हजार १५९ असून उपलब्ध चाऱ्याच्या स्तोत्रानुसार म्हणजेच वनक्षेत्र, बांधावरील, कृषिक्षेत्रात आदी. ठिकाणाहून वर्षभरात गोळा होत असलेला चारा  पशुधनासाठी पुरेसा आहे. टंचाई नाही.
   जिल्हा अधिक्षक कृषी अधिकारी अनंत पोटे यांनी माहिती देतांना म्हणले की, शेतकऱ्यांना खरिप हंगामात कोणत्याही प्रकारे अडचण येणार नाही याची खबरदारी कृषी विभागानी घेतली आहे.
जिल्हयाचे सरासरी पर्जन्यमान १५०२.३८  मिमी इतके आहे.  गेल्या खरीप हंगामात केवळ १५३३. ३१ अर्थात ९५. ९३ टक्के इतका पाऊस झाला होता.  सर्वाधिक १३५.१०  टक्के पाऊस सिरोंचा तालुक्यात तर सर्वात कमी ७४. ७८ टक्के पाऊस कोरची  तालुका क्षेत्रात झाला.
   जिल्हयात गेल्या हंगामात २ लाख २ हजार १५७ हेक्टर क्षेत्रावर पेरणी झाली होती.  सर्वाधिक १ लाख ८२ हजार ५२२ हेक्टर क्षेत्रावर धानाची पेरणी होती.  कापूस १४ हजार , तूर ५ हजार ५३३ , मका ९८३ हेक्टर, तीळ ३२८ हेक्टर आणि सोयाबीन ९२ हेक्टर व कापूस १३ हजार ९७५ हेक्टर  अशी एकूण ११५ टक्के पेरणी झाली होती.  भात पिकावर पाने गुंडाळणारी अळी  तसेच तुडतुडे यांचा प्रभाव दिसून आला.  यासाठी शेतकऱ्यांना कृषी विभागाने 50 टक्के अनुदानावर औषधांचा पुरवठा केला होता.

 खरिपाचे नियोजन

 जिल्हयात धानाचे सर्वसाधारण क्षेत्र १.५  लाख हेक्टर असले तरी गेल्या हंगामात १.८२  लाख हेक्टरवर (११९ टक्के) धान पेरणी झाली हे लक्षात घेऊन येणाऱ्या २०१९ - २० च्या खरिप हंगामात २ लाख २२ हजार हेक्टर क्षेत्रावर धान लागवडीचे नियोजन करण्यात आले आहे.
 कृषी विद्यापीठाने शिफारस केलेले चार सुत्री धान लागवड तंत्रज्ञान तसेच श्री पध्दतीने लागवड याचा अधिक वापर व्हावा यासाठी प्रचार करण्यात येत आहे.  या पध्दतीने लागवड केल्यास उत्पादन ५५ टक्के अधिक मिळते. अशीही माहिती यावेळी पालक सचिवांना अवगत करुन देण्यात आली.
 या बैठकीला आत्माचे प्रकल्प संचालक डॉ. प्रकाश पवार, कृषिअधीक्षक अनंत पेाटे, उपसंचालक जाधव, जिल्हा आरोग्य अधिकारी डॉ. शशीकांत शंभरकर, उपमुख्यकार्यकारी अधिकारी पडघन, समाज कल्याण अधिकारी सुरेश पेंदाम आदि. सर्व कार्यालय प्रमुख प्रामुख्याने उपस्थित होते. 



  Print






News - Gadchiroli | Posted : 2019-05-14






Related Photos