मोबाइल नंबर प्रमाणे सेट टॉप बॉक्सच्याही पोर्टेबलिटीची सुविधा मिळणार


वृत्तसंस्था / पुणे  : ग्राहकांना त्यांनी घेतलेली डीटीएच किंवा केबल सेवा बदलायची झाल्यास त्यांना आता सेट टॉप बॉक्स बदलण्याची गरज पडणार नाही. या वर्षाच्या अखेरीस मोबाइलला ज्याप्रमाणे नंबर पोर्टेबलिटीची सुविधा मिळाली आहे, तशी सुविधा आता सेट टॉप बॉक्सच्या बाबतही लागू होणार आहे.    केंद्रीय दूरसंचार नियामक प्राधिकरणातर्फे ही सुविधा लागू केली जाणार आहे. त्यासाठीची तयारी सुरू करण्यात आली असून नेमक्या कोणत्या तंत्रज्ञानाच्या आधारे ही व्यवस्था आणता येईल, याची चाचपणी 'ट्राय'ने सुरू केली आहे. 
ग्राहकांना एखाद्या डीटीएच कंपनीची किंवा केबलची सेवा न आवडल्यास ते सेवा देणारी कंपनी बदलतात. पण नव्या कंपनीची सेवा घ्यावीची असल्यास नव्याने सेट टॉप बॉक्स खरेदी करावा लागत होता. आता मात्र, तशी परिस्थिती उद्भवणार नाही. ग्राहकांकडे कोणत्याही कंपनीचा सेट टॉप बॉक्स असला, तरी त्याच्याद्वारे इतर कंपन्यांचेही चॅनेल्स पाहता येणे शक्य होणार आहे. ही प्रणाली कार्यान्वित करण्यासाठी 'ट्राय'ने दोन वेगवेगळ्या प्रकारच्या तंत्रज्ञानाची चाचपणी सुरू केली आहे. त्यामध्ये 'स्मार्ट कार्ड बेस्ड सोल्युशन' आणि 'डाउनलोडेबल कंडिशनल अॅक्सेस सर्व्हिस' अशा दोन प्रणालींचा समावेश आहे. 'स्मार्ट कार्ड बेस्ड सोल्युशन' या प्रणालीमध्ये ग्राहकांनी विशिष्ट कंपनीचे स्मार्ट कार्ड कोणत्याही सेट टॉप बॉक्समध्ये टाकल्यास त्याद्वारे त्या कंपनीचे डीटीएच कनेक्शन ग्राहकांना मिळणार आहे. दुसऱ्या तंत्रज्ञानामध्ये ग्राहकाच्या सेट टॉप बॉक्समध्ये जे कार्ड असेल त्याचा एक आयडी ग्राहकांना मिळेल. डीटीएच कंपन्या तो आयडी देतील. त्यावर रिचार्ज केल्यानंतर हवे ते चॅनेल्स पाहण्याची संधी ग्राहकांना मिळणार आहे. रिचार्ज केले नाही, तर मोफत असलेल्या चॅनेलचा आनंद ग्राहकांना घेता येईल. 
'ट्राय'कडून या दोन्ही प्रणालींची चाचपणी सुरू करण्यात आली असून जे तंत्रज्ञान सुरक्षा आणि ग्राहकांच्या हिताच्यादृष्टीने अधिक सक्षम असेल, त्या द्वारे 'ट्राय'कडून सेट टॉप बॉक्स बाबतीतील हे धोरण राबवण्यात येणार आहे. वर्षाअखेरपर्यंत 'ट्राय'कडून वेगवेगळ्या कार्यशाळा आयोजित करण्यात येणार असून त्यामध्ये डीटीएच कंपन्या, केबल सर्व्हिस प्रोव्हायडर्स आणि मल्टीसर्व्हिस ऑपरेटर्स (एमएसओ) यांच्यासमोर नव्या तंत्रज्ञानाची प्रात्यक्षिके सादर केली जाणार आहेत. अनेक डीटीएच कंपन्यांनी या प्रणालीमुळे त्यांचा डेटा चोरीला जाऊ शकतो, अशी शंकाही व्यक्त केली आहे. त्याचे सर्वप्रकारे समाधान करण्यात येईल, असे आश्वासन 'ट्राय'कडून देण्यात आले आहे.  



  Print






News - Rajy | Posted : 2019-05-13






Related Photos