विशेष मिशन इंद्रधनुष ५.० मोहिमेचा शुभारंभ
विदर्भ न्यूज एक्सप्रेस
प्रतिनिधी / गडचिरोली : बालकांमधील मृत्यू व आजारपणाचे प्रमाण कमी करण्यासाठी बालकांचे व त्यांच्या मातांचे संपूर्ण लसीकरण करणे अत्यंत महत्वाचे आहे. त्यामुळे नियमित लसीकरणापासून सुटलेले बालके व गरोदर माता यांचे संपूर्ण लसीकरण करुन त्यांना संरक्षित करण्याच्या दृष्टीने केंद्रशासन स्तरावरुन प्राप्त सुचनांनुसार सन२०२३-२४ या वर्षात ३ टप्प्यामध्ये विशेष मिशन इंद्रधनुष ५.० मोहिम राबविण्यात येत आहे.
सदर मोहिमेचा पहिला टप्पा आरोग्य विभागाच्या वतीने ७ ते १२ ऑगस्ट २०२३ दरम्यान राबविण्यात येत असून पहिल्या टप्प्याचा शुभारंभ ७ ऑगस्ट २०२३ रोजी प्राथमिक आरोग्य, केंद्र, गोडलवाही, ता.धानोरा येथे करण्यात आला. यावेळी मुख्य कार्यकारी अधिकारी आयुषी सिंग, जिल्हा आरोग्य अधिकारी डॉ. दावल साळवे, जिल्हा माता व बाल संगोपन अधिकारी डॉ. स्वप्निल बेले, सहाय्यक जिल्हा आरोग्य अधिकारी डॉ. सुनिल मडावी, जिल्हा सर्वेक्षण अधिकारी डॉ. विनोद मशाखेत्री, धानोराचे तालुका आरोग्य अधिकारी डॉ. सखराम हिचामी, वैद्यकीय अधिकारी डॉ. उपलेंचवार, डॉ. कुणाल मोडक व जिल्हास्तरीय व प्राथमिक आरोग्य केंद्राचे कर्मचारी उपस्थित होते.
मुख्य कार्यकारी अधिकारी आयुषी सिंग यांनी आरोग्य अधिकारी व कर्मचारी यांना त्यांच्या कार्यक्षेत्रातील पात्र बालके व गरोदर माता हया लसीकरण मोहिमेमधून सुटणार नाही, याची दक्षता घेण्याचे निर्देश दिले. जिल्हा आरोग्य अधिकारी डॉ. दावल साळवे यांनी प्रास्ताविक करतांना नियमित लसीकरणाचे महत्व पटवून दिले. त्याचप्रमाणे सामान्य जनतेने विशेष मिशन इंद्रधनुष ५.० हया मोहिमेचा लाभ घेऊन बालके व गरोदर माता यांना सुरक्षित करण्याचे आवाहन आहे.
News - Gadchiroli