महत्वाच्या बातम्या

वडसा, आमगाव रेल्वे स्थानकांचे रुप बदलणार : पंतप्रधानांच्या हस्ते ६ ऑगस्टला ऑनलाईन भूमिपूजन

विदर्भ न्यूज एक्सप्रेस

प्रतिनिधी / गडचिरोली : पंतप्रधान नरेंद्र मोदी यांच्या हस्ते रविवारी ६ ऑगस्ट ला देशातील पाचशे अमृत भारत रेल्वे स्थानकांचे आभासी पद्धतीने भूमिपूजन करण्यात येणार आहे. यात गडचिरोली जिल्ह्यातील वडसा आणि गोंदिया जिल्ह्यातील आमगाव रेल्वे स्थानकांचा समावेश असल्याची माहिती गडचिरोली चिमूर लोकसभा क्षेत्राचे खासदार अशोक नेते यांनी आज पत्रकार परिषदेत दिली. सकाळी ९ ते १२ या वेळात हा कार्यक्रम होणार असून पंतप्रधान नरेंद्र मोदी हे सकाळी ११ वाजता जनतेला संबोधित करणार आहेत. अमृत भारत रेल्वे स्थानक योजनेत समाविष्ट रेल्वे स्थानक सर्व आधुनिक सुविधांसह स्मार्ट रेल्वे स्थानक बनवण्यात येणार आहे. भूमिपूजनानंतर स्थानक च्या आधुनिकीकरणाच्या कामात सुरुवात होणार असल्याचे खासदार नेते यांनी सांगितले. गडचिरोली चिमूर लोकसभा क्षेत्रातील दोन रेल्वे स्थानकांच्या अमृत भारत रेल्वे स्थानक योजनेचा समावेश केल्याबद्दल खासदार नेते यांनी पंतप्रधानांच्या आभार मानले.

शिवाय प्रस्ताविक वडसा गडचिरोली या ५२ किलोमीटरच्या लोहमार्गासाठी १०९६ कोटी नागभीड- नागपूर या १०४ किलोमीटर साठी लोहमार्गासाठी १०० कोटी रुपये मंजूर करण्यात आले आहे. वडसा गडचिरोली लोहमार्गाच्या कामासाठी ३२२ कोटी रुपयांच्या कामाची निविदायी काढण्यात आले आहेत. भविष्यात हा मार्ग सिरोंचा आणि तेलंगणातील आदिलाबाद पर्यंत जाणार आहे. तसेच नागभीड वरून कानपा आणि वरोरा पर्यंत लोहमार्गाचा विस्तार होणार आहे. गडचिरोली धानोरा भानुप्रतापूर या लोहमार्गाच्या सर्वेक्षणाचे काम हाती घेण्यात आले आहे, अशी माहिती खासदार नेते यांनी दिली.

काँग्रेसच्या काळात महाराष्ट्रातील रेल्वेच्या विकासासाठी ११०० कोटीपेक्षा अधिक रक्कम मिळत नव्हती परंतु पंतप्रधान नरेंद्र मोदी यांच्या काळात राज्याला 12 हजार कोटी रुपये मिळण्याचे खासदार नेते यांनी सांगितले. लोहमार्गासाठी जमीन संपादित करताना शासन सध्याच्या बाजारभावानुसार दर देते असे सांगून खासदार नेते यांनी जिल्ह्यात उद्योजक यावेत यासाठी त्यांना विविध प्रकारच्या करांतून मुक्त करण्याची मागणी आपण पंतप्रधानाकडे केल्याची माहिती दिली.

पत्रकार परिषदेला भाजपाचे जिल्हाध्यक्ष प्रशांत वाघरे, जिल्हा महासचिव रवींद्र ओल्लालवार, गोविंद सारडा, आदिवासी आघाडीचे प्रदेश सरचिटणीस प्रकाश गेडाम, सदानंद कुथे, रमेश भुरसे, सुधाकर येनगंधलवार, अनिल कुनघाडकर उपस्थित होते.