बसस्थानकांवर जेनेरिक औषधालय , १ जून रोजी पहिल्या टप्प्यातील ५० एसटी स्थानकांवर होणार औषधालय सुरू


वृत्तसंस्था /  मुंबई :  मुंबईसह राज्यातील एसटी प्रवाशांसाठी आरोग्यदायी असलेल्या जेनेरिक औषधालय योजनेच्या मार्गातील सर्व अडचणी दूर झाल्या आहेत. एसटी महामंडळाच्या वर्धापन दिनी अर्थात १ जून रोजी पहिल्या टप्प्यातील ५० एसटी स्थानकांवर जेनेरिक औषधालय सुरू करण्यात येणार आहेत. विशेष म्हणजे, तब्बल अडीच वर्षांच्या प्रतीक्षेनंतर प्रवाशांसह गरजूंना स्वस्त दरात एसटी स्थानकांवर औषधे मिळण्यास सुरुवात होईल. 
एसटी स्थानकांतील जेनेरिक औषधालयांसाठी जागेची अडचण होती. यावर चर्चेअंती तोडगा निघाला असून एसटी स्थानकांत १३० स्क्वेअर फूट जागा जेनेरिक औषधालयांसाठी देण्याचे आदेश महामंडळाने परिपत्रकाद्वारे संबंधित एसटी विभागाला दिले आहेत. विभागाने औषधालय सुरू करणाऱ्या खासगी कंपनीला संबंधित जागा तातडीने हस्तांतरीत करण्याचे आदेशही महामंडळाने दिले आहेत. 
पहिल्या टप्प्यात ५० एसटी स्थानकांवर जेनेरिक औषधालय सुरू करण्यात येणार असून उर्वरित एसटी स्थानकांवर टप्प्याटप्प्याने ही योजना सुरू करण्यात येणार आहे. परळ, कुर्ला-नेहरु नगर, मुंबई सेंट्रल, पनवेल ही एसटी स्थानके शहराच्या मध्यवर्ती भागात असल्याने एसटी प्रवाशांसह सर्वसामान्य प्रवाशांना देखील या योजनेचा लाभ मिळणार आहे. एसटी महामंडळाच्या वर्धापन दिनी या योजनेचा शुभारंभ होणार असल्याचे एसटी महामंडळाने स्पष्ट केले. 
 २०१६ मध्ये एसटी महामंडळाकडून जेनेरिक औषधालये सुरू करण्याची घोषणा करण्यात आली होती. सुरुवातीला जाचक अटींमुळे औषधालयांच्या निविदा प्रक्रियेला जुलै २०१८ मध्ये कंपन्यांनी प्रतिसाद दिला नाही. अखेर अटी व शर्थी शिथिल केल्यानंतर नोव्हेंबर २०१८ मध्ये निविदाकारांनी स्वारस्य दाखवले. जानेवारी २०१९ मध्ये औषधालयांसाठी जागेची अडचण आल्यामुळे योजना रखडत होती. अखेर जागेचा मुद्दा निकाली निघाल्यानंतर औषधालय सुरू होण्याचा मार्ग मोकळा झाला आहे. 



  Print






News - Rajy | Posted : 2019-04-22






Related Photos